Таълим 14.06.2019 219

ИҚТИДОРЛИ ЎҚУВЧИЛАР АКОБИР ВА ДИЛНОЗА

Эътироф

 ИҚТИДОРЛИ ЎҚУВЧИЛАР АКОБИР ВА ДИЛНОЗА

 республика фан олимпиадасида Қашқадарё шарафини муносиб ҳимоя қилишди

 Тошкент шаҳридаги Турин политехника университетида академик лицейлар, касб-ҳунар коллежлари ва умумтаълим мактаблари ўқувчилари ўртасида умумтаълим фанлари бўйича республика олимпиадасининг IV босқичи ғолибларини тақдирлашга бағишланган тантанали маросим ўтказилди.

Қувонарлиси, совриндорлар сафида воҳамиз ёшлари ҳам бор. Хусусан, Kитоб дaвлат 1-сон ихтисослаштирилган умумтаълим мактаб-интернати ўқувчиси Дилноза Нумонова олимпиадада она тили ва адабиёт фани, Қарши муҳандислик-иқтисодиёт институти академик лицейи битирувчиси Акобир Файзуллаев эса тарих фанидан муваффақиятли қатнашиб, иккаласи ҳам ўз йўналиши бўйича 2-ўринга сазовор бўлди.

 - Ёшлигимдан мамлакатлар тарихини ўрганишга қизиқаман, - дейди Чироқчи туманидаги Ғаллачи қишлоғида туғилган Акобир. - Айниқса, бобом ва отамнинг тарихни яхши билиши менда бу фанга катта  қизиқиш уйғонишига сабаб бўлган. Шунингдек, бундай ютуққа эришишимда устозларим Шоҳида Раҳимова, Дилбар Ҳалилова ва  лицейимиздаги барча ўқитувчиларнинг ҳиссаси катта. Ўқув масканимизда мунтазам равишда ўтказиладиган ички тест синовлари билимларимизни ошириш, муносиб йўналиш танлашимизга ёрдам бермоқда.

 

- Ёшлигимдан олима бўлмоқчиман, - дейди олимпиадада вилоятимиз шарафини муносиб ҳимоя қилган яна бир ўқувчи Дилноза Нумонова.  - Устозларим кўп китоб ўқисамгина бу орзуимга эришишимни айтишган. Она тили ва адабиёт фанига бўлган кўп йиллик қизиқишим сабаб, олимпиадада иншони яхши ёздим ва 40 та тест саволига 40 та тўғри жавоб бериб, 2-ўринни қўлга киритдим. Биринчи ўринни ололмаганимда янада кўпроқ ўқишим кераклигини сездим. 

 Сожида АЛЛАЁРОВА

 Суратларда: олимпиада совридонлари устозлари билан бирга.

 Собир НАРЗИЕВ олган суратлар.