Иқтисодиёт 07.06.2019 166

НАҚ ОЛМАДЕК ЭКСПОРТБОП ОЛХЎРИ

Қашқадарё ва дунё

Заминимизда униб-ўсадиган мевалар тотли ва витаминларга бой, экологик безарардир. Пишиб етилдими, уларга ҳатто хориждан ҳам шу заҳоти харидор топилади. Ҳам юртимиз аҳолиси, ҳам чет элликларни ушбу ажойиб ноз-неъматлардан бирдек баҳраманд қилишда шубҳасиз соҳибкор боғбонларимизнинг ҳиссаси катта. Уларнинг саъй-ҳаракати билан бугун бозорларимиз турфа маҳсулотларга тўла, истеъмолдан ортгани эса экспортга йўлланаяпти.

Китоб туманидаги "Озодбек Фозилжонович" фермер хўжалиги ҳам боғдорчиликка ихтисослашган бўлиб, тасарруфидаги 10 гектар ернинг қарийб ярмида олхўри, қолган қисмида гилос парваришланаяпти. Ҳозир боғ айни кучга кирган пайт.    Олхўри дарахтлари экилганига ҳам 8 йил бўлибди. Шу кунларда эса ҳосил териб олиниб, элимиз дастурхонига пешма-пеш етказиб берилмоқда. Фермер ўз маҳсулотини ташқи бозорга ҳам чиқаришга улгургани эътиборлидир.

- Қозоғистонлик ҳамкорларимизга 4 тонна   олхўри сотдик, - дейди хўжалик иш бошқарувчиси Фозилжон Воҳидов. - Нафақат мазаси, балки ташқи кўриниши ҳам экспорт талабига мос. Меваси йирик-йирик, нақ олмадек. Харидорларга эса бу жуда маъқул келди. Ҳозирча шу билан кифояландик. Чунки ноқулай об-ҳаво сабаб ҳосилнинг асосий қисмини йўқотдик. Келгусида экспорт учун кўпроқ ишлашни режа қилганмиз. Олхўридан    ташқари гилосни ҳам таклиф этмоқчимиз. Маҳсулот сифати яқинда хўжалигимизда меҳмон бўлган чет элликларни ҳам қаноатлантирди.

Боғбоннинг айтишича, бу йилги мавсумда яна кўп миқдорда узум экспортини амалга ошириш ҳам мақсад қилинган. Аллақачон келишувга ҳам эришилган. Мўлжалдаги маҳсулотни маҳаллий ишлаб чиқарувчилардан йиғиб олиш кўзда тутилмоқда.

М.ЖЎРАЕВ

Суратларда: Китоб туманидаги "Озодбек Фозилжонович" фермер хўжалиги боғидан  лавҳалар.

Собир НАРЗИЕВ олган суратлар.