Маданият 02.04.2019 187

ОЙНИНГ КУМУШ НУРЛАРИГА ЙЎҒРИЛГАН КЎНГИЛ ҚЎШИҒИ

Тақдимот

Вилоят мусиқали драма театрида адиб Тоғай Мурод асарлари асосида Ўзбекистонда хизмат кўрсатган санъат арбоби Олимжон Салимов томонидан саҳналаштирилган "Хушвақт" романтик драмасининг тақдимоти бўлиб ўтди.

Спектаклга Тоғай Муроднинг "Ойдинда юрган  одамлар" ҳамда "От кишнаган оқшом" қиссалари асос қилиб олинган. Фарзандсиз бўлса-да, бир-бирига меҳр-муҳаббатини сақлаб қолган Зиёдулла чавандоз ва хотини Момосулув ўз келажаклари, орзу-умидлари - Хушвақтини кутиб яшайдилар. Бу муҳаббат саҳнада кўнгил қўшиғидек жаранг сочиб, уларнинг орзу-умидлари ойдиндаги ойнинг кумуш нурларига йўғрилиб кетади. Зиёдулланинг кўп изтиробларига тулпори Тарлон шерик бўлади, чавандоз одамлардан кўрмаган меҳрни отидан топгандай бўлади.

Асар сюжети собиқ тузум воқеалари билан боғлиқ ҳолда кечади. Қаҳрамонлар ўзбекнинг мусаффо қалби, сарбаланд қадди, халқнинг оғир кунлари юпанчи бўлиб хушвақтлик замони келишига ишониб-ишонтириб яшайдилар.

Қайд этиш лозим, спектакль устида тажрибали ижодий жамоа ишлаган. Саҳналаштирувчи рассом - Туркманистон халқ рассоми Бердиқули Амонсиҳат, бастакор - санъат арбоби Анвар Эргашев. Бош ролларни Фарҳод Муродов, Сожида Аширова ҳамда Маҳлиё Жумаева ижро этган.

Собир НАРЗИЕВ

Муаллиф олган суратлар.