Спорт 05.01.2017 1002

РИО СОВРИНДОРЛАРИ ЯНА БИР БОР ТАҚДИРЛАНДИ

Спорт

РИО СОВРИНДОРЛАРИ ЯНА БИР БОР ТАҚДИРЛАНДИ

Ҳеч нарса мамлакатни спортчалик дунёга тез танита олмайди. Бугун юртимиз спортчилари бу ишни муваффақият билан адо этишмоқда. Яқинда Бразилиянинг Рио-де-Жанейро шаҳрида бўлиб ўтган ёзги Олимпия ва Паралимпия ўйинларида мамлакатимиз терма жамоалари томонидан қўлга киритилган оламшумул ютуқлар бунга ёрқин мисолдир. Албатта, уларнинг юртимизни жаҳон майдонида шарафлашдек улкан хизматлари беэътибор қолмаяпти. Тўрт йилликнинг ушбу нуфузли мусобақасида муносиб иштирок этган бир гуруҳ юртдошларимиз бироз аввал Ўзбекистон Республикаси Президенти фармонига кўра юксак давлат мукофотлари ва қимматбаҳо совғалар билан тақдирланганидан хабарингиз бор.

Куни кеча Муборак тумани марказидаги “Баҳром Вафоев” номли стадионда ташкил этилган тантанали маросим эса Паралимпия ўйинларида спортнинг сузиш баҳсларида муваффақият қозониб, совриндорлар қаторидан жой эгаллаган  воҳадошларимизни тақдирлашга бағишланди. Кенг жамоатчилик вакиллари иштирок этган мазкур тадбирни вилоят ҳокими Зафар Рўзиев кириш сўзи билан очди.

Таъкидланганидек, бугун юртимизда спортга, айниқса, ёшлар спортига алоҳида эътибор қаратилмоқда. Улар спортнинг барча турлари билан шуғулланиши учун кенг қулайлик ва шарт-шароитлар яратилган. Айни шу жиҳат халқаро миқёсда ютуқларимиз салмоғи ошишига туртки бўлаяпти. Биргина юртимиз делегациясининг Паралимпия ўйинларида қайд этган натижалари соҳада амалга оширилаётган ислоҳотлар юксак самара бераётганидан далолатдир. Бунда вилоятимиз сузиш терма жамоаси аъзоларининг ҳиссаси ҳам катта бўлди. Эгалланган медалларнинг 6 таси уларга тегишли экани фикримизни тасдиқлайди.

Тақдирлаш маросимида минглаб мухлислар олқишлари остида паралимпиячиларимиз Фотима Амилова, Шоҳсанам Тошпўлатова ва Дмитрий Хорлинга Ўзбекистонда ишлаб чиқарилган “Кобальт” русумли автомобиллар топширилди. Шунингдек, ушбу спортчиларни мусобақага тайёрлашда жонбозлик кўрсатган вилоят сузиш федерацияси бош мураббийи Равшан Амилов ва федерация раиси ўринбосари Бекзод Алиқуловга янги уйларнинг калитлари берилди.

Таниқли санъаткорлар ижросидаги куй-қўшиқлар тадбирга ўзгача шукуҳ киритди.

М.ЖЎРАЕВ