Жамият 11.10.2018 39

ТАНДИРХОНА ВА СОМОНХОНАДА НИМА ЯШИРИЛГАН ЭДИ?

Божхона назорати

ТАНДИРХОНА ВА СОМОНХОНАДА НИМА ЯШИРИЛГАН ЭДИ?

Гиёҳвандликка “аср вабоси” дея бежиз таъриф берилмайди: бу иллат домига тушган инсон кейинги умри, ҳаётини бой бериши, киши пайти келиб унинг ҳар зарраси учун оғир жиноятга-да қўл уриши мумкин. Шу сабаб дунёнинг кўплаб давлатлари қаторида мамлакатимизда ҳам ушбу фаолият билан ноқонуний тарзда шуғулланиш тақиқланади.

Бироқ бунинг аксини қиладиган, гиёҳванд моддаларни ноқонуний тарзда етиштирувчи, олди-сотдиси билан шуғулланувчи ҳамда истеъмол қилувчи кишилар, афсуски, учраб турибди. Шу йилнинг 25 сентябрь куни вилоят божхона бошқармаси ходимлари томонидан ҳуқуқни муҳофаза қилувчи идоралар ходимлари билан ҳамкорликда ўтказилган тезкор тадбир давомида гиёҳванд модда савдосига чек қўйилди.

Қарши шаҳри Ғафур Ғулом маҳалласида яшовчи Р.М. мўмай даромад олиш мақсадида тадбирга шартли харидор сифатида жалб қилинган икки фуқарога 3 дона “Спички” ёзувли гугурт қутисига жойланган 7,9 грамм гиёҳванд моддани 240 минг сўмга сотаётган вақтда ашёвий далиллар билан қўлга олинди.

Р.М.нинг яшаш хонадони холислар иштирокида ва хизмат ити ёрдамида кўздан кечирилганда, ҳовлидаги тандирхона ва сомонхонада 60,2 грамм гиёҳванд модда ноқонуний равишда сақлаб келингани фош этилди.

Вилоят ИИБнинг эксперт хулосасига кўра, тадбир давомида олинган ашёвий далил – таркибида тетрагидроканнабинол моддаси бўлган 68,1 грамм оғирликдаги марихуана гиёҳвандлик моддаси эканлиги аниқланди.

Ҳозирда мазкур ҳолат юзасидан текширув ва суриштирув ҳаракатлари олиб борилмоқда.

Жаҳонгир ЭРГАШЕВ,

вилоят божхона бошқармаси бўлим бошлиғи