Iqtisodiyot 24.09.2019 44

CHEVAR AYOL 10 TA ISH O‘RNI YARATDI

Kichik biznes

Bugun biror-bir tadbirkorlik faoliyatini yo‘lga qo‘yib, ham o‘z oilasi farovonligini ta’minlayotgan, ham qo‘shimcha ish o‘rinlari yaratib, boshqalarga nafi tegayotgan ishbilarmonlar soni oshib bormoqda. Bunga soha ravnaqiga qaratilayotgan e’tibor, tadbirkorlarning davlat tomonidan qo‘llab-quvvatlanishi, ularga yaratib berilayotgan shart-sharoitlar muhim omil bo‘layotganini qayd etish lozim. Binobarin katta hayotga qadam qo‘yayotgan yoshlar, avval ish bilan band bo‘lmagan xotin-qizlarning ham hech ikkilanmay biror-bir tadbirkorlik faoliyatini yo‘lga qo‘yishga harakat qilayotgani, tez fursatda sohada muvaffaqiyatlarni qo‘lga kiritayotgani shunchaki tasodif emas.

Dehqonobodlik Barno Xoliqulovaning ham yoshligidan tikuvchilikka qiziqishi baland edi. Intilishi bois bu hunarni mukammal egallab, tanish-bilishlar orasida chevarligi bilan nom qozondi. Bugun esa u tumanning tadbirkor ayollari safida. O‘tgan yili "Har bir oila - tadbirkor" dasturi asosida bankdan 30 million so‘m imtiyozli kredit olgan chevar 7 ta zamonaviy tikuv mashinasi xarid qilib, tadbirkorlik faoliyatini boshlab yubordi. Hozirda u rahbarlik qilayotgan "Xolto‘rayeva Saodat" xususiy korxonasida 10 nafar xotin-qizning ish bilan bandligi ta’minlangan.

- Ayni paytda ayollar va bolalar liboslari, ish kiyimlari, choyshablar  tikmoqdamiz, - deydi Barno Xoliqulova. - Buyurtmaga qarab bir necha turdagi tikuvchilik mahsulotlarini yetkazib berish imkoniyatimiz bor. Aholi bilan bir qatorda, turli tashkilotlardan ham  buyurtmalar kelmoqda. Xullas, korxonamizda doim ish qizg‘in. Bu esa bizni yanada ruhlantirib, endi faoliyatni kengaytirish imkonini beradigan boshqa rejalar ustida ham ishlayapmiz.

J.QILICHOV

Sobir NARZIYEV olgan suratlar.