САВИЯ
Унинг бинойидай овози бор эди. Аввал мақом айтди. Кейин лирик қўшиқларга ўтди. Эшитганлар яхши дейишди-ю, шов-шув қилишмади, танилмади.
Унинг эса танилгиси келди. Қўшиқ "бозори"ни ўрганди ва қўлига илинган маза-матрасиз шеърга куй басталади. Клип билан "безак" бериб, беўхшов кийимда янги қўшиқ айтиб чиқди...
Айтишга айтди-ю... Шунақа қўшиқ яратганидан ўзи уялди. Репертуаридан олиб ташламоқчи бўлди ва кутилмаганда шу қўшиғи машҳур бўлиб кетди. Униям осмонларга учириб юборди.
Кейин маза-матрасиз шеърлар ёзиб, қўшиқ айтадиган бўлди у...
ИЖОБАТ
Неча йиллик орзуларини бир зумда ижобат айлади Хаёл.
ОЖИЗЛИК
Ҳақиқат бўй кўрсатганди пул ҳам ип эшолмай қолди...
ТААССУФ
Казо-казоларнинг давраларида юриб, ҳаммани оғзига қаратган, ҳеч кимни писанд қилмаган эркак қартайганида аҳмоқ хотинининг чизган чизиғидан чиқмай қолди.
ЕЛПИҒИЧ
У эрталаб кўчага чиқса қўшнининг набираси қўлидаги елпиғични варрак қилиб учириб юрибди. Елпиғичнинг елимлари ажралган, буюмлигини йўқотган...
Алланечук бўлиб кетди у. Куни кеча келинига "тўққиз" берганида тўйга келган икки юздан ортиқ аёлга шу елпиғичдан тарқатиб чиққанди. Харажат устида турган эмасми, пулини ўндиргунча неча марта "сўкиш" ҳам эшитиб олди эридан.
Бироқ...
"Шу матоҳни нимага олдим? - ўзига ўзи ғулдиради у. - Гапирса гапирсин эди гапирадигани. Энди-чи? Энди гапирмайдими?.."
Ҳам уялди, ҳам алам қилди унга...
ТИЛАНЧИ
У машинасини бир четда тўхтатиб, ойнасига сачраган лойларни артаётганди тиланчилик қилиб юрган аёллардан бири югуриб келди:
- Худо йўлига садақа қилинг, жон ака. Болаларим касал, дори олишим керак. Оллоҳ сиздан рози бўлсин. Ҳажга боринг. Ҳожи ота бўлинг...
Ҳайдовчи қўлидаги латтани тиланчига узатди:
- Ма, машинамни артиб бер, ҳақини кўнглингдагидай қилиб бераман.
Тиланчи афтини жийирди:
- Мен машина артаманми? Мен-а?!
ҚАРИНДОШ
Қариндоши вафот этганини эшитиб жанозага ошиқди ва бирдан нимадир хаёлига келиб телефонини титкилашга тушди у.
Қариндошининг уйи қаердалигини билмаскан...
Ўйлаб кўрса, муносабатлари тўйхоналардан нарига ўтмабди...
Лола ЎРОҚОВА
