Ташаббус – 2018

ҚАРШИ ТУМАНИ:

КИМНИНГ КЎЗИГА ЧЎП СУҚАЯПСИЗ?

Ҳар йили анъанавий тарзда ўтказиб келинадиган “Ташаббус” кўрик-танлови мамлакатимиздаги тадбиркор, фермер ва ҳунармандлар учун сўзсиз энг юқори даражадаги танлов ҳисобланади. Чунки асосий ютуққа Президент соврини – “Спарк” автомобили қўйилган. Аслида гап мукофотнинг қийматида ҳам эмас, давлат раҳбари томонидан танлов иштирокчиларига қаратилаётган юқори эътиборда. Шу орқали юртимизда кичик бизнес ва хусусий тадбиркорликни, фермерлик ҳаракатини ҳар томонлама қўллаб-қувватлаш, ўз фаолиятида илғор натижаларга эришаётган ишбилармонларни муносиб рағбатлантириш, уларни янада фаол ва ташаббускор бўлишга ундаш бош мақсад қилинган. Кўрик-танловни ўтказаётганда ҳам шу жиҳатлар ҳисобга олиниши, у юқори савияда ташкил этилиши шарт. Қатнашчиларнинг эса энг юқори ўринлар учун ҳалол рақобатлашишига, ғолибларни аниқлашда холислик ва ҳаққонийликни таъминлашга кенг шароит яратилиши даркор.