Истанбул полицияси одамларнинг заҳарланишига олиб келган 32 минг 900 литр метил ва этил спиртини мусодара қилди. Ўн киши қўлбола алкоголли ичимликлар ишлаб чиқариш ва сотишда гумонланиб қўлга олинган. Бу ҳақда IHA манбаси ёзган.
Шаҳар маъмурияти матбуот хизмати эса 15 нафар гумонланувчи ушлангани ҳақида айтган. Улардан тўрт нафари суд қарорига асосан ҳибс қилинган ва маҳаллий жиноят кодекси моддалари билан айбланиши мумкин.
Шунингдек, Истанбулда қалбаки спиртли ичимликлар сотгани учун йил бошидан буён 64 та субъектнинг лицензияси бекор қилинган, дея қайд этади манба.
Эслатиб ўтамиз, 14 январь куни ушбу шаҳарда қўлбола алкоголли ичимликлардан оммавий заҳарланиш содир бўлгани ва ўша куни 11 киши қалбаки спиртли ичимликлар сабаб вафот этгани хабар қилинган. Кейин қурбонлар сони яна ортган.
Anadolu ахборот агентлиги маълумотларига кўра, қўлбола алкоголли ичимликларни истеъмол қилганидан сўнг 38 киши, жумладан, 26 нафар чет эл фуқароси Истанбулдаги турли шифохоналарга мурожаат қилган.
