“Хабарингиз бўлса, 2018 йилнинг 14 июнида биз Вазирлар Маҳкамасининг 2017 йилнинг 4 сентябридаги “Инновацион ўқитиш услубларини жорий этиш йўли билан ҳайдовчиларни тайёрлаш ва қайта тайёрлаш, шунингдек уларнинг малакасини ошириш тизимини янада такомиллаштириш тўғрисида”ги 693-сон қарори хусусидаги ўз фикр-мулоҳазаларимизни “Facebook”даги расмий саҳифамизга жойлаштирган эдик, шунингдек, қатор оммабоп сайтларда ҳам унинг мазмуни кенг ёритилди.
Шу билан бир вақтда Ўзбекистон Республикаси Олий Мажлиси Сенатининг мудофаа ва хавфсизлик масалалари қўмитаси томонидан Вазирлар Маҳкамасига тегишли мурожаат юборилиб, унда жойлардаги ўрганишларда, интернет тармоқларида, аҳоли билан мулоқотлар ва ҳамюртларимизнинг мурожаатларида юридик шахсларга тегишли автотранспорт воситаларини бошқараётган ҳайдовчиларнинг малакасини ошириш борасида ўрнатилган тартибнинг ижроси билан боғлиқ қатор муаммолар кўтарилганди.
Юқоридаги ва мавзуга оид кейинги қарорларда бугунги кунда юртимизда рўйхатдан ўтиб фаолият юритаётган 303 минг 300 юридик шахс ва 152 минг 689 фермер хўжалиги мавжуд бўлиб, улардаги автотранспорт воситалари ҳайдовчи вазифасида ишловчи шахслардан ташқари раҳбарлари ёки ходимлари томонидан ҳам ҳайдовчилик гувоҳномаси ва ишончнома асосида бошқарилиши, автотранспортлардан тижорат ва юкларни ташиш мақсадида фойдаланилмаслиги ҳисобга олинмаган.
Қолаверса, юридик шахсларга тегишли автотранспорт воситаларини бошқараётган ҳайдовчилар икки йилда бир марта малака оширишга мажбурлиги белгиланган бўлиб, йўл ҳаракати қоидалари тез ва мунтазам ўзгармаслигини инобатга олганда, малака ошириш учун қисқа муддат, яъни икки йил белгилангани баён этилганди.
Қўмитамиз томонидан Вазирлар Маҳкамасига хат орқали ушбу мурожаат йўлланганига ҳам роппа-роса бир ой бўлди. “Жисмоний ва юридик шахсларнинг мурожаатлари тўғрисида”ги Ўзбекистон Республикаси Қонунига мувофиқ, бу вақт мобайнида Ҳукумат томонидан бизнинг мурожаатимиз ўрганиб чиқилиб, у бўйича тегишли чора-тадбирлар кўрилиши лозим эди. Бироқ, шу пайтгача бизга бу борада на ёзма, на оғзаки тарзда жавоб келмади. Ваҳоланки, “Facebook” ижтимоий тармоғида ҳамда қатор оммабоп сайтларда жойлаштирилган юқоридаги фикр-мулоҳазаларимиз фойдаланувчилар орасида катта қизиқиш уйғотди ва тўлалигича қўллаб-қувватланди. Хусусан, “kun.uz” сайтидаги ушбу материал 36 мингдан зиёд, “daryo.uz” сайтида 35 минг, “xabar.uz” сайтида эса 5 мингдан ортиқ маротаба ўқиб чиқилган. Шунинг ўзи юртдошларимизнинг ушбу мавзу уларнинг манфаатларига бевосита дахлдорлигидан далолат бериб турибди.
Фермерлар далада айни иш авж олган бир пайтда йиғим-терим чоғларида малака ошираман деб бой берган вақти бебаҳо эканлиги ҳақидаги фикр-мулоҳазалар минглаб кишилар томонидан қўллаб-қувватланди. Шунингдек, ҳайдовчилар малака ошириш тизимини қайта кўриб чиқиб, маълум муддатда (лекин икки йилда эмас, чунки йўл ҳаракати қоидаларига камдан-кам ҳолларда ўзгартиш киритилади) малака ошириши шарт бўлган тоифа шахсларни аниқ белгилаш ва улар доирасини объектив равишда қисқартириш, бунда малака ошириш курслари учун “Avtotest Report” МЧЖга тўланадиган маблағ ҳажмини ҳам юридик шахслар фаолият кўлами ва йўналишидан келиб чиқиб табақалаштириш хусусида кўплаб фикрлар билдирилди.
Бироқ, расмий мурожаатнома йўлланганига ва ижтимоий тармоқларда бу борада қизғин баҳс-мунозаралар давом этаётганига қарамай, Вазирлар Маҳкамаси ҳамон сукут сақламоқда...”
Мазкур постга билдирилган муносабатлардан деярли барча “Автотест”нинг қайта ўқитиш ва малака ошириш тизимидан норозилиги кўринади. Хусусан, “Ismailov Erkinbay” номли фойдаланувчи қарамоғида 25 ҳайдовчи борлиги, бироқ айни пайтда уларнинг ҳар бирини қайта ўқитишга қийналаётгани, шу сабаб ҳайдовчиларга ўз ойлиги ҳисобидан ўқиш таклиф қилинганда, 3 ҳайдовчи ишни ташлаб кетганини ёзади.
Кўпчилик фойдаланувчилар “Автотест” масаласини яна бир бор муҳокамага қўйиш зарурлигини таъкидлаган.
Н.ХЎЖАЕВ
