Ўзбекистон Қизил Ярим Ой жамияти вилоят, Қарши шаҳар ташкилотлари, вилоят фавқулодда вазиятлар, соғлиқни сақлаш, ўрта махсус, касб-ҳунар таълими бошқармалари ҳамкорлигида ўтказилган тадбирда ўқувчи-ёшлар, соҳа мутахассислари иштирок этишди.
Амалий машғулотлар жараёнида кўнгилли сандружиначиларга малакали инструкторлар ёрдамида биринчи тиббий ёрдам турлари ва шакллари ҳақида маълумотлар берилди.
Сўнг ўқувчиларнинг назарий билимлари синовдан ўтказилди. Бунда юрак массажи, турли жароҳатларни боғлаш ва тўғри муолажа қилиш, шунингдек, фавқулодда вазиятларда жароҳатланганларга биринчи тиббий ёрдам кўрсатиш кўникмаси кўрикдан ўтказилди.
- Бундай амалий машғулотлар фавқулодда вазиятлар содир бўлганда инсон ҳаётини сақлаб қолишда муҳим аҳамият касб этади, - дейди Ўзбекистон Қизил Ярим Ой жамияти Қарши шаҳар ташкилоти раҳбари Анвар Расулов. - Чунки ҳаётда шундай ҳолатлар бўладики, билим ва кўникмалар сустлигидан ёрдамга муҳтож одамга нафингиз тегмай қолади. Бизнинг мақсадимиз – биринчи тиббий ёрдам кўрсатишни ҳаммага ўргатиш, буни барча билиш керак. Кутилмаган пайтда юз берадиган ҳолатга доим тайёр бўлиши зарур.
Аҳоли саломатлигини муҳофазалаш, турли фавқулодда вазиятларда тезкор ва малакали биринчи тиббий ёрдам кўрсатиш тизимини такомиллаштиришга қаратилган бундай тадбирлар давом этмоқда.
М.МУРОДОВ
