Жумладан, назарда тутилган тадбирлар ва топшириқларни бажариш учун туманда 4 та, яъни туман ҳокими, прокурори, ички ишлар бўлими бошлиғи ва туман давлат солиқ инспекцияси раҳбари бошчилигида секторлар ташкил этилди. Сектор аъзолари томонидан ўзларига бириктирилган ҳудудларнинг ижтимоий-иқтисодий ривожланишини таъминлашга доир устувор чора-тадбирлар бўйича йўл харитаси ишлаб чиқилди.
Шунингдек, аҳоли билан мулоқотлар асосида аниқланган муаммоларни бартараф этиш чоралари кўрилди. Хусусан, Сардоба маҳалласида жойлашган врачлик пунктида аёллар учун малакали врач етишмайди. Бобур маҳалласидаги кўп қаватли уйларнинг том қисми, ертўлалари, подъездларини таъмирлаш бўйича олиб борилаётган ишлар жуда суст, қониқарсиз аҳволда. Геолог маҳалласидаги 2 қаватли уйларда табиий газ босими паст. Сардоба маҳалласи ҳудудидаги хўжаликлараро сув тақсимлаш иншоотининг электр ҳисоблагичи яроқсиз ҳолга келиб, электр тармоғидан узиб қўйилган ва уни янги электрон ҳисоблагичга алмаштириш зарур. Қолаверса, туман ҳудудидаги йўллар таъмирталаб. Туман марказида, умуман жойларда тозалаш ва ободонлаштириш ишларини янада кучайтириш даркор.
Мазкур масалалар сектор аъзолари томонидан атрофлича ўрганилди ҳамда уларни тегишли мутасаддилар иштирокида ҳал қилиш чоралари кўрилди. Энг муҳими, ҳудудлардаги аҳволни секторларга бўлинган ҳолда ўрганиш раҳбар-ходимлар масъулиятини ошириши баробарида аҳолининг барча қатламлари дарду ташвишларини эшитиш, жойлардаги муаммо ва камчиликларни рўй-рост кўриш имкониятини тақдим этмоқда.
Т.ПЎЛАТОВ
