Унда республикамизда фаолият юритаётган мусиқа ва санъатга ихтисослашган муассасаларнинг иқтидорли ўқувчилари турли йўналишларда ўз маҳоратларини намойиш этишди. Хусусан, танловда Қарши маданият ва туризм коллежидан 14 нафар ёш йигит-қиз фаол иштирок этиб, “анъанавий чолғучилик”, “анъанавий хонандалик”, “ўзбек халқ чолғу асбоблари”, “оммавий байрамлар” ҳамда “фольклор ижрочилиги” йўналиши бўйича тенгдошлари билан беллашдилар. Қувонарлиси, улардан 6 нафари ғолиблар сафидан жой олиб, 1-, 2-, ва 3-даражали дипломлар билан тақдирланди.
Жумладан, “фольклор ижрочилиги” йўналишида ҳар учала ўрин қашқадарёликларга насиб этди.
- Бугун мамлакатимизда фольклор асарларни, айниқса, достонларимизни фақатгина ёзиб олиш ва нашр этиш билан чегараланиб қолмасдан, улардаги эзгулик ғояларини ёшлар онгига сингдириш, келажак авлодларга соф етказишга алоҳида эътибор қаратилган, - дейди танлов совриндори Мафтуна Шоймардонова. - Бунда устозларимиз, уста бахшилар бизга катта маҳорат мактаби бўлмоқда. Бобо бахшилар анъаналарини давом эттирган ҳолда ўзбек фольклорини ривожлантиришга ўз ҳиссамизни қўшишга тайёрмиз.
Шунингдек, коллеж ўқувчиси Фарангиз Зайниддинова “анъанавий чолғучилик йўналиши”да 2-ўринга, Ферангиз Узоқова “халқ чолғу йўналиши” бўйича 3-ўринга, Ситора Раҳмонова эса “қўғирчоқ актёрлиги йўналиши”да 3-ўринга лойиқ кўрилди.
Воҳид РАЖАБОВ, Қарши маданият ва туризм коллежи ўқитувчиси
