Шу боис гиёҳвандликка қарши кураш мунтазам кучайтириб борилади. Хусусан, мамлакатимизда ҳам ушбу масалага давлат ва миллатнинг эртасини ҳал қилувчи омил сифатида қаралади. Шунга мувофиқ, жорий йил 1 февралдан 1 мартгача "Ёшлар орасида гиёҳванд воситалар тарқалишига қарши кураш ойлиги" деб эълон қилиниб, таълим муассасалари, ёшлар фаолият кўрсатаётган корхона ва ташкилотларда профилактика тадбирлари ўтказилмоқда.
Худди шундай тадбир Қарши муҳандислик-иқтисодиёт институтида Ўзбекистон мусулмонлари идорасининг вилоят вакиллиги билан ҳамкорликда ташкил этилди.
- Гиёҳвандлик ўз жонига қасд қилиш, ўзини ўзи ҳалокат чоҳига отиш билан тенг, - деди Қарши шаҳридаги Наво жомеъ масжиди имом-ноиби Қувондиқ Хўжаёров. - Шунинг учун ота-оналар, педагоглар, маҳалла аҳли, кенг жамоатчилик ёшларнинг юриш-туриши, ким билан дўстлашаётгани, бўш вақтини қаерда ва қандай ўтказаётгани, уларнинг кўча-кўйларда бемаҳал, сабабсиз юришига эътиборли бўлиши, назоратни бир зум бўлсин сусайтирмаслиги талаб этилади.
Тадбир савол-жавобларга бой бўлди.
Шоҳиста БОЗОРОВА
