“Соғлом она ва бола йили” Давлат дастури ижросини таъминлаш, тиббий хизмат маданиятини, ҳамширанинг касбий билимини юксалтириш мақсадида ҳамда 12 май – Халқаро ҳамширалар куни муносабати билан ташкил этилган ушбу тадбирда кўрик-танловнинг шаҳар ва туманлар босқичида ғолиб бўлган 15 нафар иштирокчи ўзаро беллашди.
Улар биринчи шартда ўзи, касби, яшаётган жойи, меҳнат қилаётган жамоаси, у ерда бўлаётган ўзгаришлар, ислоҳотлар тўғрисида сўзлаб бердилар. Иккинчи шартда қатнашчиларнинг тиббиёт ва ижтимоий-ҳуқуқий соҳаларга оид билимлари тест саволлари орқали баҳоланди.
Иштирокчилар амалий билимлар кўригида тиббиёт муассасаларига мурожаат қилган беморларни қабул қилиш, аҳволини баҳолаш ва қўйилган ҳамширалик ташхиси асосида буюрилган тиббий муолажаларни олиб бориш борасида кўргазмали чиқиш қилишди.
Кўрик-танловнинг сўнгги шарти – эркин мавзу бўлиб, ҳамширалар санъатнинг ўзлари хоҳлаган тури бўйича истеъдодларини намойиш этдилар.
Ана шу шартлар асосида иштирокчилар тўплаган баллар жамланмасига кўра, биринчи ўринни республика ихтисослаштирилган акушерлик ва гинекология илмий тиббиёт маркази Қарши филиали ҳамшираси Хуршида Саидова, иккинчи ўринни вилоят кўп тармоқли тиббиёт маркази ҳамшираси Дилором Маҳманазарова, учинчи ўринни Шаҳрисабз тиббиёт бирлашмасига қарашли 1-оилавий поликлиника ҳамшираси Рисолат Жуманазарова қўлга киритди.
- Ҳар бир касбнинг ўз масъулияти, машаққати бор, - дейди Хуршида Саидова. - Ҳар бир инсон ўз вазифасини бажарар экан, аввало халқ хизматида эканлигини унутишга ҳақли эмас. Шу сабабли ҳар доим билим ва малакамизни ошириб бориб, бурч ва вазифаларимизни виждонан адо этолсаккина бизга билдирилган ишончни тўлиқ оқлаган бўламиз.
Тадбир сўнгида барча иштирокчиларга ташкилотчиларнинг эсдалик совғалари берилди.
Энди вилоят босқичи ғолиби кўрик-танловнинг республика босқичида воҳамиз шарафини ҳимоя қилади.
Шоҳиста БОЗОРОВА
