Таниқли хонанда Шуҳрат Дарёнинг вилоятимиз марказида ўтказилган хайрия концертлари чироқчилик истеъдодли шоира Бахтинисо Маҳмудованинг ана шу шеъри асосида айтиладиган қўшиқ билан бошланди.
Ёш шоира узоқ йиллардан бери оғир дард билан курашиб келади. Аравачага михланиб қолган бўлишига қарамасдан руҳини чўктирмади, хасталикка асло бўйин эгмади. Юрагидаги матонат, шижоат, ҳаётга бўлган беназир муҳаббатни мисраларига жо этди. "Ҳовучдаги юрак" ва "Уфққа йўл" тўпламларидаги бетакрор ташбеҳларга бой шеърлари билан қалбларга меҳр, завқ ва ҳайрат улашди. У асло одамлардан тасалли истамади, балки муштдеккина жуссаси билан ўзи барчага далда бўлиб яшаяпти.
Бахтинисо кейинги йилларда қатор ижодий танловларда ғолибликни қўлга киритди. Ёшлар иттифоқининг назм йўналишидаги мукофотига сазовор бўлди. Забардаст адибларимиз тилига тушди, эътирофига эришди.
Яқинда у Туркияда малакали мутахассисларнинг тиббий кўригидан ўтиб қайтди. Мутахассисларнинг қайд этишларича, унинг дардига шифо бор. Хуллас, декабрь ойида Бахтинисони уч босқичли мураккаб жарроҳлик амалиёти кутмоқда. Бу эса табиийки, каттагина харажатни талаб этади.
Хонанда Шуҳрат Дарё ва шоиранинг ижодкор дўстлари пойтахтдаги бир қанча олий ўқув юртларида хайрия концертлари ташкил этишиб, тушган маблағларни шоиранинг ҳисоб рақамига ўтказишди.
Қарши шаҳридаги маданият ва аҳоли дам олиш масканида, Қарши давлат университетида ва вилоят мусиқали драма театрида ўтказилган хайрия концертида мухлислар шоиранинг шеърларидан ва хонанданинг қўшиқларидан баҳраманд бўлишди.
...Шуҳрат Дарё концерт ўртасида ижро этган "Энг гуллаган ёшлик чоғимда" қўшиғини негадир авж нуқтасида тўхтатди. Даврадагилар унинг бу ҳаракати шунчаки тасодиф эмас, мурувватга, ҳаётга муҳаббатга чорлов эканлигини ҳайрат билан эътироф этишди...
Н.ЭГАМОВ.
ТАҲРИРИЯТДАН: Бахтинисонинг шифо топишига кўмаклашишни истаган саховатпеша юртдошларимиз эътиборига қуйидагиларни маълум қиламиз:
Бахтинисо Маҳмудованинг телефон рақами: +998 91 945-27-93
CLICK, PAYME: 8600 1404 6526 8465
Юридик шахслар учун: "Ипак Йўли" АТБ,
2312 0000 3000 0111 9119 МФО: 01119
