Таъкидлаб ўтиш жоиз, Президентимиз Шавкат Мирзиёевнинг 2017 йил 12 январдаги «Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида»ги фармойишига асосан, Ўзбекистон “Миллий тикланиш” демократик партияси томонидан ҳам бу йўналишда бир қанча ишлар амалга оширилмоқда. “Навоий ворислари” кўрик-танлови ҳам шулар жумласидандир.
Буюк мутафаккир бобомиз Алишер Навоий ҳаёти ва ижодини ёшлар орасида кенг тарғиб қилиш, бой адабий меросини ўрганиш, китобхонлик ва мутолаа маданиятини юксалтиришга қаратилган мазкур танловнинг вилоят босқичида туман ва шаҳар миқёсида ғолибликни қўлга киритган 14 нафар ёш китобхон иштирок этди.
Улар энг кўп ғазал ёд олиш, ғазални ифодали ўқиш, ғазал матнининг насрий баёни (ёзма шарҳи)ни ярата олиш ҳамда ғазал матнидаги тушуниш қийин бўлган сўзларни изоҳлаш каби шартлар бўйича ўз билимини синовдан ўтказди.
Барча шартлар бўйича энг кўп балл тўплаган Озода Тожиддинова биринчи ўринни эгаллаб, танловнинг республика босқичига йўлланма олган бўлса, иккинчи ўрин Китоб туманидаги 2-ихтисослаштирилган мактаб-интернат ўқувчиси Ўзукжамолой Ҳусановага насиб этди. Яккабоғ туманидаги 8-мактаби 9-синф ўқувчиси Жонгул Холмўминова эса учинчи ўринга сазовор бўлди.
Шаҳноза ҚАҲҲОРЗОДА, ЎзМТДП вилоят кенгаши мутахассиси
