Она Ватанимизга хизмат қилиш, унинг тинчлиги ва сарҳадларининг хавфсизлиги йўлида тиним билмай маҳоратини ошириб бориш, профессионал армиямизга муносиб зобит бўлиш ҳар бир эр йигитнинг орзуси, муқаддас бурчидир. Ҳар йили 14 январь – Ватан ҳимоячилари куни арафасида уларнинг хизматлари муносиб эътироф этилиб, ҳурмат бажо келтирилади.
Бу йил ҳам мамлакатимизда бўлгани сингари вилоятимизда ҳам қатор тадбирлар бўлиб ўтмоқда. Бугун ҳам Қашқадарё вилоят ҳокимлиги, вилоят сектор раҳбарлари, вилоят ташкилот ва корхоналари, муассасалари раҳбарлари, ҳарбий қисмлар командирлари ва кенг жамоатчилик вакиллари Ўзбекистон Республикаси Қуролли Кучлари ташкил этилганлигининг 33 йиллиги ҳамда 14 январь – Ватан ҳимоячилари куни муносабати билан Қарши шаҳридаги Мотамсаро она ҳайкали пойига ҳарбий оркестр жўрлигида гулчамбарлар қўйишди.
Тадбирда вилоят ҳокими Муротжон Азимов иштирок этди ва 14 январь – Ватан ҳимоячилари куни муносабати билан барча ҳарбийларни табриклади.
Таъкидлаш лозимки, мамлакатимиз мудофаа салоҳиятини янада кучайтириш, ҳарбийларни ҳар томонлама қўллаб-қувватлаш ва рағбатлантириш борасида салмоқли ишлар амалга оширилмоқда. Хусусан, биргина ўтган йилнинг ўзида Жануби-ғарбий махсус ҳарбий округига қарашли ҳарбий қисмларда хизмат қилаётган ҳарбий хизматчилар учун 200 хонадонга мўлжалланган 6 та кўп қаватли уй қурилиб фойдаланишга топширилди. 130 нафарга яқин ҳарбий хизматчининг фарзандларини олий таълим муассасаларига кириши учун имтиёзли тавсияномалар тақдим этилди.
Маданий-маърифий тадбир ҳақиқий байрам тусини олди. Ҳарбийлар ва уларнинг оила аъзолари учун бир пиёла чой устида концерт дастури ташкил этилди. Ватанни мадҳ этувчи мардонавор куй-қўшиқлар барчага хуш кайфият улашди.
Бу каби маданий-маърифий тадбирлар вилоятнинг барча туман ва шаҳарларида бўлиб ўтди.
Баҳодир ҲАЛИМОВ
Собир НАРЗИЕВ олган суратлар.
