Бунёдкорлик
Қарши шаҳри Мустақиллик шоҳкўчасида жойлашган йўл ўтказгични реконструкция қилиш бўйича лойиҳа-қидирув ташкилотини аниқлаш учун тендер ўтказилди.
Қурилиш соҳасида электрон давлат харидларини ўтказиш платформасида кўрсатилганидек, ушбу тендерда 9 та иштирокчи қатнашган ва якунида "Қурилишда муҳандислик қидирувлари, геоахборот, шаҳарсозлик кадастри лойиҳа илмий-текшириш институти" масъулияти чекланган жамияти (Тошкент шаҳри) ғолиб чиққан. Энди мазкур ташкилот белгиланган муддат (20 кун) ва ўзи таклиф қилган нархда (3 миллиард 360 миллион сўм, бошланғич нархдан 20 фоиз паст) йўл ўтказгични реконструкция қилиш ишларининг ишчи лойиҳасини тайёрлаб бериши лозим.
Маълумотларга кўра, халқ орасида "Аэропорт кўприги" ва "Қарши-Бешкент йўлидаги кўприк" деб номланадиган йўл ўтказгичнинг лойиҳавий қуввати 404 погонометрни ташкил этади, аммо аниқ узунлиги лойиҳа-қидирув ишлари даврида аниқланади. Шунга ўхшаш иншоотларнинг қийматидан келиб чиқиб объектнинг тахминий баҳоси 350 миллиард сўмни ташкил этиши мумкин, деган фикр билдирилмоқда, аммо бунда ҳам кўприкнинг якуний қийматига лойиҳа-смета ҳужжатлари ишлаб чиқилиб, экспертиза хулосаси олинганидан сўнг аниқлик киритилади. Буюртмачи талабига мувофиқ, реконструкция жараёнида йўл ўтказгичнинг параметрлари асосий кўчанинг параметрларига мослаштирилади ва қайта қуриш ишлари 4R92 "Қарши-Бешкент-Таллиқўрғон-Касби-Жейнов-Помуқ" автомобиль йўлигача амалга оширилади.
Шу ўринда таъкидлаш лозимки, Қарши шаҳри Мустақиллик шоҳкўчасида жойлашган йўл ўтказгич 50 йил олдин - 1974 йилда қуриб битказилган бўлиб, кўп жиҳатдан замонавий талабларга жавоб бермай қолган. Шу боис мазкур объектни реконструкция қилиб, энини икки баробар кенгайтириш, яъни "кўприк"даги 4 тасмали йўлни 8 тасмалига айлантириш мўлжалланмоқда. Бунинг учун мавжуд иншоотнинг ёнида (Қарши шаҳридан боришда ўнг томонда) эни шунга тенг келадиган яна битта "кўприк"ни қуриш, у қуриб битказилгач эса ҳозир ишлатилаётган йўл ўтказгични бузиб олиш ва янгисини барпо этиш режалаштирилган. Айтилишича, реконструкция жараёни 2025-2027 йиллар давомида амалга оширилади ва қурилиш-тиклаш ишлари автомобиллар ҳаракатига ҳам, поездлар қатновига ҳам деярли ҳалақит бермай бажарилади. Аслида қандай бўлишини эса вақт кўрсатади.
Т.НИЗОМОВ
