Ғузор туманида фаолият юритаётган “Global bazis” хусусий фирмаси замонавий эшик ва ромлар, уй ва офис мебеллари ишлаб чиқаришни йўлга қўйди. Ҳозирда корхона цехида 300 хилдан ортиқ кўринишдаги ана шундай жиҳозлар тайёрланмоқда.
- Тижорат банкидан 100 минг АҚШ доллари миқдорида кредит олиб, хориждан ишлаб чиқариш фаолиятимиз учун зарур бўлган замонавий технологияларни олиб келдик, - дейди корхона иш юритувчиси Тўлқин Норсаидов. - Натижада барча ишлар компьютерлашган тизимда амалга оширилмоқда. Бу маҳсулотни жаҳон стандартлари даражасида, мукаммал аниқлик ва бежирим дизайнларда ишлаб чиқариш имконини бераяпти.
Субъектнинг фаолият бошлаганига кўп вақт ўтмаган бўлса-да, бу ерда ишлаб чиқарилаётган жиҳозларга харидорларнинг қизиқиши баланд. Маҳсулотларнинг буюртма асосида, исталган ўлчам ва дизайнда етказиб берилиши уларнинг танлаш имкониятини оширмоқда. Корхона ходимларининг таъкидлашича, ҳозирга қадар Қарши шаҳрида қурилган бир нечта янги уй-жойларга маҳсулот етказиб берилган. Аҳолидан тушаётган буюртмалар сони ҳам ошиб бормоқда.
Аҳамиятли томони, бу ерда 10 нафар киши доимий иш билан таъминланган. Улар қаторида коллеж битирувчилари ҳам бор.
Ж.БОЙМУРОДОВ
Суратларда корхона фаолиятидан лавҳалар.
Собир НАРЗИЕВ олган суратлар.
