Нидерландия ҳукумати полиция участкалари ва қамоқхоналарда жой етишмаслиги сабаб маҳкумларни жазо муддати тугашидан уч кун олдин уйига қўйиб юборишни бошлади. Бу ҳақда мамлакат адлия ва хавфсизлик вазирлиги раҳбари Ингрид Кунрад маълум қилган.
У парламентга ёзган хатида “бу қўлга олинганлар ва жиноятчиларни ҳибсга жойлаштиришни давом эттириш учун ягона имконият” эканлигини қайд этган.
“Мен учун энг муҳими – гумонланувчи ёхуд жиноят содир этган одам ушлангани ёки ҳибс қилингани. Бу қонун устуворлиги учун жуда муҳим”, деб ёзган Ингрид Кунрад.
Унинг сўзларига кўра, айтилган чора вақтинчалик характерга эга. Етти суткагача муддатга ҳибс қилинган, шунингдек, маълум руҳий касаллиги бор маҳкумлардан бошқа барча тутқунлар муддатидан олдин озод бўлиш ҳуқуқига эга.
Ҳукумат Эстония қамоқхоналари камераларини ижарага олиш имкониятини муаммонинг ечимларидан бири сифатида кўриб чиқмоқда.
